
De toneelvereniging ONDER ONS bestaat 150 jaar. (wellicht ontstaan uit het Conscience-taalgenootschap, gegroeid in de schoot van de verenging BONDEN DER OUD LEERLINGEN VAN DE LAGERE –EN MIDDELBARE SCHOLEN). Oud-leerling Guy De Coninck is nu voorzitter.
Niemand is meer verbonden met ONDER ONS dan REGISSEUR en AUTEUR van de toneelstukken Ronnie De Reese, oud-onderwijzer d’Oefenschool, oud-leerling 1968 RNS Blankenberge.
Kon. Tonneelkring “Onder Ons” Blankenberge vzw 150 jaar: toespraak R. De Reese onder de foto’s.





Beste leden en sympathisanten
Oender Ons wit van wanten
150 joar bestoan is nie an iederein gegeven
Wa gieng Konckelberghe gezeid hèn ât ie nu nog moeten leven
Gedrevenheid, passie, humor en geiren bie de leute
En het applaus van e heile meute
Ipgericht in 1873 als Concience’s Taal, Toneel en Letterkundig Genootschap
Mor in 1896 makten ze al een overstap
De Bonden van Oud Leerlingen der Lagere en Middelbare Scholen
’t Moe zien dan z’ in die tied under activiteiten achter lange titels verscholen
De kring was doar een oenderdeil van
Mor uutendelik hadden ze een actieplan
In 1921 kreig de krieng z’n definitieve noame van Onder Ons
En traden ip, in e zoale met balcons
Ip halfvasten speelden ze iedere keiren e stik vor e growt publiek
En in 1934 kwamen ze met een etwadde uniek
Den eisten Blankenbergsche revue zag het levenslicht
Toe damme in 2013 met de 65ste zien gezwicht
Deur de diversiteit van het publiek en een tekort an schrieverstalent
Was een toneilstik spelen uutendelik een equivalent
In 1989 startte Onder Ons met toneil vo de jeugd
En dat deid de vereinigienge vreinig vele deugd
Ook de senioren wierden nie vergeten
Want die groep was geiren bie de leute en da was geweten
Want in 1997 wierd er ook een seniorengroep ipgericht
En kwamen der vele in het spotlicht
Eindracht makt macht zeggen ze altied
Mo van de fusie van joeng en oed heed Onder Ons zekers gin spiet
Van die 150 joar hè ‘k der 55 kunnen van genieten
En dan ze vroeger in Onder Ons lange durfden plakken moe je nie verschieten
Met ’t Pompiertje van Ivan, no Wienduune no de chif van ’t muziek
M’ hadden zelfs e noame, heil uniek
“Fret en zuupgezelschap Onder Ons” ip e plakatje
Hoevele keirden er nuchter were, schat je?
’t Woaren de goeden tieden met meir dan 14 hoederd entrees
’t Kost er tonne vanof vor gratis growte soupees
Activiteiten van andere vereinigiengen wierden tonne ipgeschoven
Omdan de menschen no de revue kwamen gestoven
Alhoewel de tieden oendertuschen heil veranderd zien
Ein twadde is ’t er nog nie veranderd sedertdien
Me moaken nog allemolle geiren leute en plezier
En da bewiest junder ipkomste hier
Onder Ons heed in Blankenberge wè geschiedenisse geschreven
En ziender goeie herinneriengen achter gebleven
Wist je dat Onder Ons an de basis lag van uus hedendoags karnaval
En staken ze ook met de folkloregroep “Ebbe en Vloed” van wal
Deien en doen nog mee an bepaalde activiteiten
d’ Hoavenfeisten, Bel’lumière, blommestoet, Valentijn, dank an de leden under capaciteiten
Sedert da me bestoan
Liet Guy slechts vier vowrzitters an hem verbie goan
Da wilt dus zeggen os ‘k ’t goed verstoan
Hemme met uuze vowzitter nog lange nie gedoan
Me vieren nu 150 joar
Wat dat er ook gebeurt, hoed junder kloar
Me doen vowrs want 200 ligt nie verre der vanof
En moest je giender da kloaren viende ‘k ’t vreindig tof
‘k Goan nu mo stoppen met ip de loftrompette te bloazen
Vor achter een fantastische “Vliegen” ebitje… uut te bloazen
Ronnie De Reese
Blankenberge 28 april 2023